అమరావతి: ఆంధ్రప్రదేశ్‌లో ఓటర్ల జాబితా ప్రత్యేక సమగ్ర సవరణ (SIR) ప్రక్రియకు సంబంధించి కేంద్ర ఎన్నికల సంఘం కీలక నిర్ణయం తీసుకుంది. రాష్ట్ర ఎన్నికల ప్రధాన అధికారి చేసిన విజ్ఞప్తి మేరకు ఎస్‌ఐఆర్‌ షెడ్యూల్ గడువును పొడిగిస్తూ సవరించిన తేదీలను ఖరారు చేసింది. తాజా షెడ్యూల్ ప్రకారం ఓటర్ల జాబితాపై క్లెయిమ్‌లు, అభ్యంతరాల దాఖలుకు ఈ నెల (సెప్టెంబర్) 10వ తేదీ వరకు వెసులుబాటు కల్పించింది.
ఓటర్ల జాబితాలో పేర్లు, వివరాలకు సంబంధించి ఎలాంటి అభ్యంతరాలు ఉన్నా, అర్హులైన కొత్త ఓటర్ల పేర్లు జాబితాలో చేరకపోయినా ఈ గడువులోగా దరఖాస్తు చేసుకోవాలని అధికారులు స్పష్టం చేశారు. ప్రజల నుంచి అందిన క్లెయిమ్‌లు, అభ్యంతరాలను క్షుణ్ణంగా పరిశీలించి పరిష్కరించేందుకు అక్టోబర్ 5వ తేదీ వరకు గడువు నిర్దేశించారు. ఈ ప్రక్రియ అంతా పూర్తయిన తర్వాత వచ్చే నెల అక్టోబర్ 9న రాష్ట్ర తుది ఓటర్ల జాబితాను అధికారికంగా విడుదల చేయనున్నారు.
ఈ మేరకు సవరించిన ఎస్‌ఐఆర్‌ షెడ్యూల్‌ను తక్షణమే రాష్ట్ర గెజిట్‌లో ప్రచురించాలని కేంద్ర ఎన్నికల సంఘం స్పష్టమైన ఆదేశాలు జారీ చేసింది. షెడ్యూల్‌లో జరిగిన మార్పులపై రాష్ట్రవ్యాప్తంగా రాజకీయ పార్టీలు, ప్రజలకు విస్తృతంగా అవగాహన కల్పించాలని రాష్ట్ర ఎన్నికల ప్రధాన అధికారికి సూచించింది. అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకుని, ఓటర్ల జాబితాలో తమ పేరు సక్రమంగా ఉందో లేదో పరిశీలించుకోవాలని అధికారులు కోరారు. ఒకవేళ పేర్లలో తప్పులున్నా, అడ్రస్ మారినా లేదా ఇతర వివరాల్లో తేడాలున్నా నిర్ణీత గడువులోగా దరఖాస్తు చేసుకుని సరిదిద్దుకోవాలని సూచించారు.