HomeTelangana News

తెలంగాణ

22ఏ భూముల్లో ఒక్క అర్హుడికీ అన్యాయం జరగొద్దు

రాష్ట్రంలో 22ఏ నిషేధిత జాబితాలో ఉన్న భూముల విషయంలో ఏ పేదవాడికి, నిజమైన హక్కుదారుడికి అన్యాయం జరగొద్దని రెవెన్యూ మంత్రి పొంగులేటి శ్రీనివాసరెడ్డి స్పష్టం చేశారు. సచివాలయంలో ఉన్నతస్థాయి సమీక్ష నిర్వహించిన ఆయన, కొత్తగా ఒక్క సెంటు భూమిని కూడా నిషేధిత జాబితాలో చేర్చలేదని వెల్లడించారు. 22ఏ దరఖాస్తులు, కోర్టు ఆదేశాలపై 45 రోజుల గడువులోనే నిర్ణయం తీసుకోవాలని కలెక్టర్లను ఆదేశించారు.

సాగునీటి ప్రాజెక్టులకు పర్యావరణ అనుమతులు మంజూరు చేయండి

పాలమూరు-రంగారెడ్డి, గౌరవెల్లి, సీతమ్మ సాగర్, డిండి ప్రాజెక్టులకు సత్వరమే పర్యావరణ అనుమతులు మంజూరు చేయాలని కేంద్ర అటవీ, పర్యావరణ శాఖ మంత్రి భూపేందర్ యాదవ్‌కు సీఎం రేవంత్ రెడ్డి విజ్ఞప్తి చేశారు. మంత్రి ఉత్తమ్ కుమార్ రెడ్డి, పలువురు ఎంపీలతో కలిసి ఢిల్లీలోని పార్లమెంట్‌లో కేంద్ర మంత్రితో సమావేశమయ్యారు.

కేంద్ర మంత్రి సీఆర్ పాటిల్‌తో సీఎం భేటీ

ఢిల్లీ పర్యటనలో ఉన్న ముఖ్యమంత్రి రేవంత్ రెడ్డి కేంద్ర జల్‌శక్తి శాఖ మంత్రి సీఆర్ పాటిల్‌తో సమావేశమయ్యారు. తుమ్మిడిహెట్టి ప్రాజెక్టు ఎత్తును 150 మీటర్లకు పెంచేలా మహారాష్ట్ర ప్రభుత్వంతో చర్చలు జరిపి ఒప్పించాలని సీఎం విజ్ఞప్తి చేశారు. మంత్రి ఉత్తమ్ కుమార్ రెడ్డి, ఎంపీలు కూడా ఈ భేటీలో పాల్గొన్నారు.

తెలంగాణ రైజింగ్ సమ్మిట్‌కు ఏర్పాట్లు వేగవంతం

వచ్చే డిసెంబర్‌లో నిర్వహించనున్న "తెలంగాణ రైజింగ్–2026" గ్లోబల్ సమ్మిట్‌ను విజయవంతం చేసేందుకు అన్ని ప్రభుత్వ శాఖలు సమన్వయంతో విస్తృత ఏర్పాట్లు చేయాలని రాష్ట్ర ప్రభుత్వ ప్రధాన కార్యదర్శి సంజయ్ జాజు ఆదేశించారు. బుధవారం సచివాలయంలో జరిగిన ఉన్నతస్థాయి సమీక్షా సమావేశంలో మాట్లాడిన సిఎస్, తెలంగాణ రైజింగ్–2047 లక్ష్య సాధనలో భాగంగా రాష్ట్రానికి భారీ పెట్టుబడులను ఆకర్షించడానికి ఈ సమ్మిట్ కీలక వేదికగా నిలుస్తుందని స్పష్టం చేశారు.

పోలీస్ ఉద్యోగ నియామకాలు పకడ్బందీగా చేపట్టాలి

రాష్ట్రంలో ఇటీవల ప్రకటించిన 7,437 పోలీస్ ఉద్యోగాల నియామక ప్రక్రియను పూర్తి పారదర్శకంగా, పకడ్బందీగా నిర్వహించాలని ముఖ్యమంత్రి రేవంత్ రెడ్డి అధికారులను ఆదేశించారు. నియామకాలకు భంగం కలిగించేందుకు కొన్ని శక్తులు యత్నిస్తున్నాయన్న నిఘా వర్గాల నివేదికల నేపథ్యంలో డీజీపీ సీవీ ఆనంద్‌తో పాటు ఉన్నతాధికారులతో సీఎం అత్యవసర సమావేశం నిర్వహించారు. ప్రశ్నపత్రాల తయారీ నుండి పరీక్షా కేంద్రాల వరకు కట్టుదిట్టమైన భద్రతతో పాటు కోచింగ్ సెంటర్లు, సైబర్ దళారులపై ప్రత్యేక నిఘా పెట్టాలని స్పష్టం చేశారు.

ఈ నెల 17 నుంచి సీఎం రేవంత్ రెడ్డి విదేశీ పర్యటన

తెలంగాణకు భారీగా విదేశీ పెట్టుబడులను ఆకర్షించడమే లక్ష్యంగా ముఖ్యమంత్రి రేవంత్ రెడ్డి ఈ నెల 17 నుంచి సెప్టెంబర్ 10 వరకు నాలుగు దేశాలలో విదేశీ పర్యటన చేపట్టనున్నారు. యూకే, అమెరికా, జర్మనీ, చైనా దేశాలలో పర్యటించే సీఎం బృందం.. పారిశ్రామికవేత్తలు, విదేశీ విశ్వవిద్యాలయాలు, క్రీడా సంస్థల ప్రతినిధులతో వరుస సమావేశాలు నిర్వహించనుంది.