సింహాచలంలో వైభవంగా శ్రీ స్వామివారి స్వర్ణపుష్పార్చన సేవ.. బుకింగ్ వివరాలివే

విశాఖపట్నం: ప్రసిద్ధ పుణ్యక్షేత్రమైన సింహాచలంలోని శ్రీ వరాహ లక్ష్మీనృసింహ స్వామి వారి దేవస్థానంలో అత్యంత విశిష్టంగా నిర్వహించబడే ‘స్వర్ణపుష్పార్చన’ సేవ భక్తిశ్రద్ధలతో కొనసాగుతోంది. ఈ పవిత్రమైన సేవలో దంపతులుగా పాల్గొని స్వామివారి దివ్య అనుగ్రహాన్ని పొందేలా దేవస్థానం ఏర్పాట్లు చేసింది. ఈ సేవ నిర్వహించే రోజులు, సమయాలు, ఇతర వివరాలను అధికారులు వెల్లడించారు.

సేవా సమయాలు

ప్రతి గురువారం ఉదయం 07.30 గంటల నుండి 08.30 గంటల వరకు ఈ సేవ నిర్వహిస్తారు. అలాగే శనివారం, ఆదివారాల్లో భక్తుల సౌలభ్యం కోసం మూడు విడతలుగా (మొదటి బ్యాచ్ ఉదయం 07.30 గంటలకు, రెండో బ్యాచ్ ఉదయం 09.00 గంటలకు, మూడో బ్యాచ్ ఉదయం 10.30 గంటలకు) స్వర్ణపుష్పార్చన సేవ అందుబాటులో ఉంటుంది. దంపతులకు ఈ సేవకు సంబంధించిన టికెట్ రుసుము రూ. 2,116/- గా నిర్ణయించారు. ఈ సేవలో పాల్గొన్న భక్తులకు కండువా, జాకెట్టు, రెండు పులిహోర ప్యాకెట్లు, రెండు లడ్డూలను కానుకగా అందజేస్తారు.

బుకింగ్ విధానం

భక్తులు తమకు అనుకూలమైన తేదీని, సమయాన్ని ఎంపిక చేసుకుని ఈ సేవను సులభంగా బుక్ చేసుకోవచ్చు. అధికారిక వెబ్‌సైట్ (aptemples.ap.gov.in) ద్వారా రుసుము చెల్లించి స్వర్ణపుష్పార్చన స్లాట్ రిజర్వ్ చేసుకోవచ్చు. అలాగే వాట్సాప్ ‘మనమిత్ర’ చాట్‌బాట్ నంబర్ 9552300009 ద్వారా కూడా ఈ సేవను సులభంగా బుక్ చేసుకునే సౌకర్యం కల్పించారు. భక్తులు ఈ అవకాశాన్ని సద్వినియోగం చేసుకొని శ్రీ వరాహ లక్ష్మీనృసింహ స్వామి వారి కృపకు పాత్రులు కావాలని ఆలయ వర్గాలు కోరాయి.