ఆమనగల్లు: సమాజ నిర్మాణంలో, భావితరాలను ఉత్తమ పౌరులుగా తీర్చిదిద్దడంలో ఉపాధ్యాయుల పాత్రే అత్యంత కీలకమని ప్రముఖ ప్రొఫెసర్ విశ్వనాథం పేర్కొన్నారు. మాస్టర్ మైండ్స్ ఎడ్యుకేషన్ సొసైటీ ఆధ్వర్యంలో ఆదివారం ఆమనగల్లులో జిల్లా వ్యాప్తంగా ఉత్తమ ప్రతిభ కనబరిచిన ఉపాధ్యాయులను ఘనంగా సన్మానించే కార్యక్రమం నిర్వహించారు. ఈ కార్యక్రమంలో ఆమనగల్లు పట్టణంలోని పలు ప్రైవేట్ పాఠశాలలకు చెందిన సుమారు 30 మంది ఉత్తమ ఉపాధ్యాయులు ఘనంగా అవార్డులు అందుకున్నారు.
ఈ వేడుకకు ముఖ్య అతిథిగా విచ్చేసిన ప్రొఫెసర్ విశ్వనాథం ఉపాధ్యాయులను శాలువాలు, జ్ఞాపికలతో సత్కరించారు. ఈ సందర్భంగా ఆయన మాట్లాడుతూ.. విద్యార్థులకు కేవలం పాఠ్యాంశాలను బోధించడమే కాకుండా, వారిలో క్రమశిక్షణ, నైతిక విలువలు, సామాజిక బాధ్యతను పెంపొందించడంలో ఉపాధ్యాయులు అంకితభావంతో పనిచేస్తున్నారని కొనియాడారు. విద్యార్థుల ఉజ్వల భవిష్యత్తును తీర్చిదిద్దేందుకు నిరంతరం శ్రమిస్తున్న ఉపాధ్యాయుల సేవలను గుర్తించి సత్కరించడం ఎంతైనా అభినందనీయమన్నారు. ఇలాంటి సన్మానాలు, ప్రోత్సాహకాలు విద్యా రంగంలో ఉపాధ్యాయులకు మరింత ఉత్సాహాన్ని నింపుతాయని పేర్కొన్నారు.
అవార్డులు అందుకున్న ఉపాధ్యాయులు మాస్టర్ మైండ్స్ ఎడ్యుకేషన్ సొసైటీ నిర్వాహకులకు తమ కృతజ్ఞతలు తెలిపారు. ఈ కార్యక్రమంలో పలువురు విద్యావేత్తలు, పాఠశాలల ప్రతినిధులు, ఉపాధ్యాయులు, విద్యార్థుల తల్లిదండ్రులు పాల్గొన్నారు.