కడ్తాల్: తెలంగాణ సంస్కృతి, సంప్రదాయాలకు ప్రతీకగా నిలిచే అపురూప పండుగ బతుకమ్మ వేడుకలను కడ్తాల్‌లోని ప్రగతి ఉన్నత పాఠశాలలో అత్యంత వైభవంగా నిర్వహించారు. పాఠశాల కరస్పాండెంట్ సువర్ణ అధ్యక్షతన జరిగిన ఈ వేడుకల్లో విద్యార్థినీ విద్యార్థులు, ఉపాధ్యాయులు ఉత్సాహంగా పాల్గొన్నారు. ఈ సందర్భంగా చిన్నారులు రంగురంగుల పూలు, తంగేడు పూలతో అందంగా బతుకమ్మలను పేర్చి ప్రత్యేక పూజలు చేశారు.
అనంతరం కోలాటాలతో, సాంప్రదాయ బతుకమ్మ పాటలతో విద్యార్థులు ఉత్సాహంగా నృత్యాలు చేస్తూ పండుగ సంబరాలను అంబరాన్నంటేలా నిర్వహించారు. పాఠశాల ఉపాధ్యాయులు సైతం విద్యార్థులతో కలిసి ఉత్సాహంగా ఆడిపాడి వేడుకల్లో సందడి చేశారు. తెలంగాణ సాంస్కృతిక వైభవాన్ని, ప్రకృతిని ఆరాధించే సంప్రదాయాన్ని చాటిచెప్పే బతుకమ్మ పండుగ విశిష్టతను ఈ సందర్భంగా విద్యార్థులకు వివరించారు. మన సంస్కృతిని, సంప్రదాయాలను భావితరాలు కాపాడుకోవాల్సిన ఆవశ్యకతను ఈ వేడుకలు ఘనంగా చాటిచెప్పాయని పాఠశాలకు విచ్చేసిన విశిష్ట అతిథులు కొనియాడారు.
