కేశంపేట: మండల పరిధిలోని సంతాపూర్ గ్రామంలో వినాయక చవితి ఉత్సవాలను పురస్కరించుకుని బీఆర్ఎస్ పార్టీ నాయకుల ఆధ్వర్యంలో అన్నదాన కార్యక్రమం నిర్వహించారు. గ్రామంలో ప్రతిష్టించిన గణనాథుని మండపం వద్ద ఈ అన్నదాన కార్యక్రమాన్ని ఏర్పాటు చేశారు. బీఆర్ఎస్ నాయకులు సాజిద్ ఆధ్వర్యంలో కొనసాగిన ఈ కార్యక్రమానికి గ్రామస్తులు, భక్తులు హాజరయ్యారు.
ఈ సందర్భంగా తొలుత గణనాథుడికి భక్తిశ్రద్ధలతో ప్రత్యేక పూజలు నిర్వహించి, అనంతరం భక్తులకు అన్నప్రసాద వితరణ చేశారు. ఇలాంటి ధార్మిక, సేవా కార్యక్రమాలు ప్రజల్లో భక్తిభావాన్ని పెంపొందించడంతో పాటు గ్రామంలో అందరి మధ్య ఐక్యతను, సోదరభావాన్ని చాటుతాయని నాయకులు ఈ సందర్భంగా పేర్కొన్నారు.
ఈ కార్యక్రమంలో మండల పార్టీ అధ్యక్షులు మురళీధర్ రెడ్డి, సర్పంచులు వేణుగోపాల్, రామకృష్ణ, మాజీ సర్పంచ్ నవీన్ కుమార్, జమాల్, వినాయక కమిటీ సభ్యులు సురేందర్ రెడ్డి, సందీప్, చందు, తదితరులతో పాటు గ్రామ ప్రజలు, యువకులు పాల్గొన్నారు.