హైదరాబాద్ ఇందిరమ్మ ఇళ్లపై సీఎం రేవంత్ కీలక ఆదేశాలు

హైదరాబాద్: హైదరాబాద్ 'క్యూర్' (CURE) ప్రాజెక్ట్ పరిధిలో నిర్మించే ఇందిరమ్మ ఇండ్లు నిరుపేదల ఉపాధి ప్రదేశాలకు దగ్గరగా, జనావాసాల మధ్యే ఉండాలని ముఖ్యమంత్రి రేవంత్ రెడ్డి స్పష్టమైన ఆదేశాలు జారీ చేశారు. హైదరాబాద్ నగరంలో ఇందిరమ్మ ఇండ్ల నిర్మాణంపై మంత్రులు పొన్నం ప్రభాకర్, పొంగులేటి శ్రీనివాస్ రెడ్డి, సంబంధిత శాఖల ఉన్నతాధికారులతో కలిసి సీఎం రేవంత్ రెడ్డి గురువారం ఉన్నత స్థాయి సమీక్షా సమావేశం నిర్వహించారు.

తొలి విడతగా 17 నియోజకవర్గాల్లో 7,680 ఫ్లాట్లు

హైదరాబాద్ నగర పరిధిలో ఉపాధి కేంద్రాలకు సమీపంలో ఉంటేనే పేదలకు నిజమైన ప్రయోజనం చేకూరుతుందని ముఖ్యమంత్రి అభిప్రాయపడ్డారు. ఔటర్ రింగ్ రోడ్డు (ORR) లోపల ఉన్న వివిధ ప్రభుత్వ శాఖల నిరుపయోగ స్థలాలను వెంటనే సేకరించి, ఆయా శాఖలకు ప్రత్యామ్నాయ స్థలాలను కేటాయించాలని అధికారులకు సూచించారు. నిరుపేదల కోసం మొదటి విడతగా 17 నియోజకవర్గాల్లో 7,680 ఫ్లాట్ల నిర్మాణానికి అధికారులు ప్రణాళికలు సిద్ధం చేశారు.

ప్రభుత్వ సబ్సిడీ మరియు ఇంటి నిర్మాణ వ్యయం

528 చదరపు అడుగుల విస్తీర్ణంలో నిర్మించే ఒక్కో ఇందిరమ్మ ఇంటి నిర్మాణం వ్యయం సుమారు 11 లక్షల రూపాయలుగా అంచనా వేశారు. ఇందులో ప్రభుత్వం ఉచితంగా స్థలాన్ని అందించడంతో పాటు 5 లక్షల రూపాయల సబ్సిడీని భరిస్తుంది. మిగిలిన 6 లక్షల రూపాయలను లబ్ధిదారులు చెల్లించాల్సి ఉంటుందని స్పష్టం చేశారు. స్థలాల గుర్తింపు ప్రక్రియను వేగవంతం చేసి నిరుపేదలకు త్వరితగతిన నివాసాలు కల్పించాలని సీఎం అధికారులను ఆదేశించారు.