కల్వకుర్తి: కాంగ్రెస్ ప్రభుత్వం అధికారంలోకి వచ్చిన తర్వాత రైతులు విద్యుత్ కోతలు, సాగునీటి కొరతతో తీవ్ర ఇబ్బందులు ఎదుర్కొంటున్నారని తెలంగాణ రాష్ట్ర ఫుడ్ కమిషన్ చైర్మన్ గోలి శ్రీనివాస్ రెడ్డి విమర్శించారు. శుక్రవారం కల్వకుర్తిలో మాజీ మున్సిపల్ చైర్మన్ ఎడ్మ సత్యంతో కలిసి ఆయన మీడియాతో మాట్లాడారు. అంతకుముందు కల్వకుర్తి మండలం ఎల్లికల్ గ్రామపంచాయతీ పరిధిలోని సబ్‌స్టేషన్‌ను సందర్శించి విద్యుత్ సరఫరా పరిస్థితిని పరిశీలించారు. అలాగే కేఎల్‌ఐ (KLI) కాలువల్లో నీటి లభ్యతను పరిశీలించి సాగునీటి సమస్యలను తెలుసుకున్నారు.
ఈ సందర్భంగా గోలి శ్రీనివాస్ రెడ్డి మాట్లాడుతూ.. "ఒకవైపు కరెంట్ కోతలు.. మరోవైపు సాగునీటి కొరత.. రైతులు పంటలు పండించుకోవాలా? లేక ప్రభుత్వ కార్యాలయాల చుట్టూ తిరగాలా?" అని ప్రభుత్వాన్ని నిలదీశారు. ఎల్‌నినో పరిస్థితులను సాకుగా చూపిస్తూ రైతులకు సక్రమంగా విద్యుత్ సరఫరా చేయకపోవడం సరికాదన్నారు. రైతులకు 24 గంటల విద్యుత్, సాగునీరు అందిస్తామని చెప్పిన కాంగ్రెస్ ప్రభుత్వం.. నేడు ఆచరణలో విఫలమై రైతులను ఇబ్బందులకు గురిచేస్తోందని ఆరోపించారు. రాష్ట్రంలో పాలనను సమర్థవంతంగా నిర్వహించలేక సీఎం రేవంత్ రెడ్డి ప్రభుత్వం చేతులెత్తేసిందని ఎద్దేవా చేశారు.
రైతులకు నిరంతర విద్యుత్ సరఫరా చేయడంతో పాటు, కేఎల్‌ఐ కాలువల ద్వారా సాగునీరు అందించేందుకు ప్రభుత్వం తక్షణ చర్యలు తీసుకోవాలని డిమాండ్ చేశారు. "రైతు బాగుంటేనే రాష్ట్రం బాగుంటుంది. అన్నదాతను ఇబ్బందులకు గురిచేసే విధానాలను ప్రభుత్వం విడనాడాలి. రైతుల సమస్యలు పరిష్కరించే వరకు బీఆర్ఎస్ పార్టీ వారి పక్షాన నిలుస్తుంది" అని స్పష్టం చేశారు.
ఈ కార్యక్రమంలో మాజీ మున్సిపల్ చైర్మన్ ఎడ్మ సత్యం, కల్వకుర్తి మండల బీఆర్ఎస్ పార్టీ అధ్యక్షులు సింగం విజయ్ గౌడ్, వెల్దండ మండల అధ్యక్షులు పుట్టారామిరెడ్డి, కల్వకుర్తి మాజీ మార్కెట్ కమిటీ చైర్మన్ బాలయ్య, మాజీ వైస్ చైర్మన్ షాహిద్, వెల్దండ మాజీ వైస్ ఎంపీపీ అనిల్, నాయకులు సూర్య ప్రకాష్ రావు, తహిరల్లీ, సైదులు, సురేష్, శ్రీను, సర్పంచులు కృష్ణయ్య, యాదగిరి రెడ్డి, బచ్చలకూర శ్రీనివాసులు, పాండు గౌడ్, బలస్వామి, మున్యానాయక్, బీఆర్ఎస్ పార్టీ వార్డు సభ్యులు, నాయకులు, కార్యకర్తలు, రైతులు పాల్గొన్నారు.