విజయనగరం: ఉత్తరాంధ్ర అభివృద్ధికి అత్యంత కీలకమైన భోగాపురం అంతర్జాతీయ విమానాశ్రయం (Bhogapuram ASR International Airport) ప్రారంభోత్సవ రవాణా ఏర్పాట్లపై విజయనగరం జిల్లా కలెక్టరేట్ వేదికగా శుక్రవారం ఉన్నతస్థాయి సమీక్షా సమావేశం నిర్వహించారు.
కలెక్టరేట్లో మంత్రుల కీలక భేటీ
రాష్ట్ర పురపాలక, పట్టణాభివృద్ధి శాఖ మంత్రి పి. నారాయణ అధ్యక్షతన జరిగిన ఈ సమావేశంలో రవాణా శాఖ మంత్రి మండిపల్లి రాంప్రసాద్ రెడ్డి, రవాణా శాఖ కమిషనర్ మహేష్ కుమార్ సింహా, జిల్లా కలెక్టర్ మరియు వివిధ శాఖల ఉన్నతాధికారులు పాల్గొన్నారు. ఎయిర్పోర్టు ప్రారంభోత్సవ సమయానికి అవసరమైన అనుసంధాన రవాణా సౌకర్యాలపై మంత్రులు అధికారులతో సుదీర్ఘంగా చర్చించారు.
ప్రయాణికులకు మెరుగైన రవాణా కనెక్టివిటీ
విమానాశ్రయానికి వివిధ ప్రాంతాల నుంచి వచ్చే ప్రయాణికులకు ఎలాంటి ఇబ్బందులు కలగకుండా రోడ్డు, ప్రజా రవాణా వ్యవస్థలను సిద్ధం చేయాలని అధికారులకు సూచించారు. ప్రధాన నగరాల నుంచి ఎయిర్పోర్టుకు కనెక్టివిటీని బలోపేతం చేసే పనులను, ప్రారంభోత్సవ రవాణా ప్రణాళికలను వేగవంతం చేయాలని ఆదేశించారు.
ఈ విమానాశ్రయం అందుబాటులోకి వస్తే ఉత్తరాంధ్ర ఆర్థిక, పర్యాటక రంగాలు మునుపెన్నడూ లేని విధంగా పురోగతి సాధిస్తాయని, ఆ దిశగా సంబంధిత అధికారులు సమన్వయంతో పనిచేసి ప్రారంభోత్సవ ఏర్పాట్లను నిర్దేశిత గడువులోగా పూర్తి చేయాలని మంత్రులు స్పష్టం చేశారు.