షాద్ నగర్: పిల్లల శారీరక, మానసిక ఆరోగ్యానికి కడుపులోని నులి పురుగులు తీవ్ర ముప్పుగా పరిణమిస్తాయని షాద్ నగర్ మున్సిపల్ చైర్మన్ అగ్గనూర్ బసవేశ్వర్ హెచ్చరించారు. నులి పురుగులు ఉన్నట్లయితే ఎదిగే పిల్లలు త్వరగా అనారోగ్యం బారిన పడతారని, తద్వారా వారి చదువుపై ప్రతికూల ప్రభావం పడుతుందని ఆందోళన వ్యక్తం చేశారు. షాద్ నగర్ పట్టణంలోని ఫరూక్ నగర్ ప్రభుత్వ ఉన్నత పాఠశాలలో, 12వార్డు కౌన్సిలర్ కళ్యాణ్ కార్ దిలీప్ కుమార్ ఆధ్వర్యంలో సోమవారం ఏర్పాటు చేసిన 'జాతీయ నులి పురుగుల నిర్మూలన కార్యక్రమాన్ని' మున్సిపల్ చైర్మన్ బసవేశ్వర్ ముఖ్య అతిథిగా పాల్గొని అధికారికంగా ప్రారంభించారు.
ఆల్బెండజోల్తోనే నులి పురుగుల నిర్మూలన
ఈ సందర్భంగా విద్యార్థులను ఉద్దేశించి ఆయన మాట్లాడుతూ.. పిల్లలకు ఆహారం ద్వారా లభించే కీలకమైన శక్తిని, పోషకాలను కడుపులోని నులి పురుగులు గ్రహిస్తాయని వివరించారు. దీనివల్ల పిల్లలు బలహీనంగా, నిస్సత్తువగా, అలసటగా మారి తరచూ వ్యాధుల బారిన పడతారని, చదువుపై పూర్తి దృష్టి సారించలేకపోతారని ఆవేదన వ్యక్తం చేశారు. ఈ సమస్యకు శాశ్వత పరిష్కారంగా 'ఆల్బెండజోల్' మాత్రలను ఉపయోగించాలని సూచించారు.
ఒక్కో ఆల్బెండజోల్ టాబ్లెట్ (400 మిల్లీ గ్రాములు)ను ఒకటి నుంచి 19 ఏళ్లలోపు వారందరూ తప్పకుండా ఏడాదికి రెండు దఫాలు వేసుకోవాలని మున్సిపల్ చైర్మన్ అగ్గనూర్ బసవేశ్వర్ ఆరోగ్య అధికారులకు, విద్యార్థులకు సూచించారు. దీని ద్వారా పిల్లల్లో రక్తహీనతను నివారించి, వారిలో రోగనిరోధక శక్తిని పెంచవచ్చని పేర్కొన్నారు.
భారీగా తరలివచ్చిన అధికారులు, ప్రజాప్రతినిధులు
ఈ కార్యక్రమంలో షాద్ నగర్ మున్సిపల్ వైస్ చైర్మన్ అందే మోహన్ ముదిరాజ్, మార్కెట్ కమిటీ వైస్ ఛైర్మన్ బాబర్ అలీ ఖాన్, కౌన్సిలర్ దిలీప్, పెంటయ్య, కొప్పునూరి ప్రవీణ్, బచ్చలి నరేష్, రాజు నాయక్ పాల్గొన్నారు. ఆరోగ్య మరియు విద్యాశాఖ అధికారుల నుండి మండల విద్యాధికారి మనోహర్, డిప్యూటీ డిఎం అండ్ హెచ్ ఓ విజయ లక్ష్మి, హెల్త్ ఎడ్యుకెటర్ శ్రీనివాస్, సోలిపూర్, అనిల్, ముబారక్ అలీ ఖాన్, మాధవలు యాదవ్, గంగమొని సత్తయ్య, పాఠశాల ప్రధానోపాధ్యాయుడు రాజశేఖర్ రెడ్డి, సాయి, సురేష్ తదితరులు హాజరయ్యారు. ఉపాధ్యాయులు, పెద్ద సంఖ్యలో విద్యార్థులు పాల్గొని కార్యక్రమాన్ని విజయవంతం చేశారు.