హుస్నాబాద్: సిద్దిపేట జిల్లా హుస్నాబాద్ నియోజకవర్గ రూపురేఖలను మార్చేలా, ఈ ప్రాంతాన్ని తెలంగాణలోనే ఒక మోడల్ నియోజకవర్గంగా తీర్చిదిద్దేందుకు ప్రజా ప్రభుత్వం సరికొత్త ప్రణాళికలతో ముందుకెళ్తోందని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ మరియు కార్మిక, ఉపాధి శిక్షణ శాఖ మంత్రి గడ్డం వివేక్ వెంకటస్వామి స్పష్టం చేశారు. నియోజకవర్గ పరిధిలో విద్యా, వ్యవసాయ, ఉపాధి రంగాలకు సంబంధించి కోట్లాది రూపాయల వ్యయంతో చేపట్టనున్న పలు ప్రతిష్టాత్మక ప్రాజెక్టులకు మంత్రులు గురువారం ఘనంగా శంకుస్థాపనలు మరియు భూమిపూజలు నిర్వహించారు.
ఈ సుదీర్ఘ పర్యటనలో మున్నూరు కాపు కార్పొరేషన్ చైర్మన్ బొమ్మ శ్రీరామ్ చక్రవర్తి, ఉపాధి శిక్షణ శాఖ డైరెక్టర్ క్రాంతి వెస్లీ, సిద్దిపేట పోలీస్ కమిషనర్ రష్మీ పెరుమాళ్ ఐపీఎస్, అడిషనల్ కలెక్టర్ లక్ష్మీ కిరణ్, మున్సిపల్ చైర్మన్ దండి లక్ష్మి తదితరులు పాల్గొన్నారు.
యువతకు ఐటీ జాబ్స్ రేంజ్ శిక్షణ – రూ.45.15 కోట్లతో ఏటీసీ
తోటపల్లి గ్రామంలో రూ.45.15 కోట్ల భారీ బడ్జెట్తో టాటా టెక్నాలజీస్ (Tata Technologies) భాగస్వామ్యంతో ఏర్పాటు చేయనున్న అత్యాధునిక ‘అడ్వాన్స్డ్ టెక్నాలజీ సెంటర్’ (ATC) భవన నిర్మాణానికి మంత్రులు భూమిపూజ చేశారు.
ఆధునిక కోర్సులు: ఈ సెంటర్ ద్వారా స్థానిక యువతకు రోబోటిక్స్, 3డీ ప్రింటింగ్, ఇండస్ట్రియల్ ఆటోమేషన్, ఎలక్ట్రిక్ వెహికల్ (EV) మెయింటెనెన్స్, ఇంటర్నెట్ ఆఫ్ థింగ్స్ (IoT) మరియు డిజిటల్ మ్యాన్యుఫ్యాక్చరింగ్ వంటి గ్లోబల్ ట్రెండింగ్ కోర్సుల్లో శిక్షణ ఇస్తారు.
నెలకు రూ.2 వేల స్టైపెండ్: దేశంలోనే తొలిసారిగా ఈ ఏటీసీలలో శిక్షణ పొందే ప్రతి విద్యార్థికి తెలంగాణ ప్రభుత్వం నెలకు రూ.2,000 చొప్పున స్టైపెండ్ అందిస్తుందని మంత్రి వివేక్ వెంకటస్వామి వెల్లడించారు. రాష్ట్రవ్యాప్తంగా రూ.4,000 కోట్లతో 119 కేంద్రాలను నిర్మిస్తున్నట్లు ఆయన పేర్కొన్నారు.
టామ్కాం విదేశీ జాబ్ మేళా – జర్మన్ లాంగ్వేజ్ సెంటర్
హుస్నాబాద్లో ప్రభుత్వ ఆధ్వర్యంలోని ‘టామ్కాం’ (TOMCOM) సంస్థ నిర్వహించిన మెగా విదేశీ ఉద్యోగ మేళాకు అద్భుత స్పందన లభించింది. సుమారు 1,500 మంది నిరుద్యోగులు దరఖాస్తు చేసుకోగా, ఎంపికైన వారికి మంత్రులు నియామక పత్రాలు అందించారు. విదేశీ ఉపాధిని ప్రోత్సహించేందుకు ప్రభుత్వం రూ.90 కోట్ల బడ్జెట్ కేటాయించిందని, హుస్నాబాద్లో త్వరలోనే ‘జర్మన్ భాషా శిక్షణ కేంద్రం’ ఏర్పాటు చేస్తామని మంత్రులు ప్రకటించారు. జర్మన్ భాష నేర్చుకునే యువతకు అదనంగా నెలకు రూ.1,000 ప్రోత్సాహకం ఇస్తామన్నారు.
ఆయిల్ పామ్ సాగు పెంచితే జీపీలకు రూ.10 లక్షల వరకు బోనస్
జనగామ గ్రామంలో నిర్వహించిన మెగా ఆయిల్ పామ్ ప్లాంటేషన్ కార్యక్రమంలో పాల్గొన్న మంత్రి పొన్నం ప్రభాకర్, వరికి ప్రత్యామ్నాయంగా రైతులు ఆయిల్ పామ్ వైపు రావాలన్నారు. ప్రభుత్వం ఎకరాకు రూ.50,000 సబ్సిడీ ఇస్తోందని, నర్మేట ఫ్యాక్టరీ వల్ల మార్కెటింగ్ ఇబ్బందులు లేవన్నారు. సాగును ఉద్యమంలా తీసుకెళ్లేందుకు గ్రామ పంచాయతీలకు (GP) బంపర్ ఆఫర్ ప్రకటించారు:
చిన్న గ్రామాలు: 100 ఎకరాల్లో ఆయిల్ పామ్ సాగు పూర్తి చేస్తే రూ.5 లక్షల ప్రత్యేక అభివృద్ధి నిధులు.
పెద్ద గ్రామాలు: 200 ఎకరాల సాగు మైలురాయిని దాటితే రూ.10 లక్షల ప్రత్యేక అభివృద్ధి నిధులు బహుమతిగా ఇస్తామని ప్రకటించారు.
విద్యా హబ్గా ఉమ్మాపూర్
ఉమ్మాపూర్ గ్రామంలో నూతన శాతవాహన యూనివర్సిటీ ఇంజనీరింగ్ కాలేజీ శాశ్వత భవనాల నిర్మాణానికి శంకుస్థాపన చేస్తూ.. ఏడాదిలోగా పనులు పూర్తి చేయాలని అధికారులను ఆదేశించారు. విద్యార్థుల హాస్టల్ కోసం ఇప్పటికే రూ.15 కోట్లు మంజూరయ్యాయని తెలిపారు. కాంగ్రెస్ ప్రభుత్వం రాగానే హుస్నాబాద్కు ఇంజనీరింగ్, లా (Law), ఫార్మసీ కళాశాలలు మంజూరు చేసిందని, గౌరవెల్లి ప్రాజెక్ట్ కాలువల కోసం రూ.220 కోట్లు కేటాయించిందని మంత్రులు గుర్తుచేశారు.