భద్రాచలంలో మీడియా సెమినార్.. స్వీయ నియంత్రణపై అకాడమీ చైర్మన్ కీలక వ్యాఖ్యలు

భద్రాచలం: మారుతున్న ఆధునిక కాలానికి అనుగుణంగా మీడియా రంగానికి స్వయం నియంత్రణ ఎంతో అవసరమని తెలంగాణ మీడియా అకాడమీ చైర్మన్ కే. శ్రీనివాసరెడ్డి తెలిపారు. సమాచారాన్ని ప్రజలకు వేగంగా చేరవేసే పోటీలో ఎలాంటి పొరపాట్లకు ఆస్కారం ఇవ్వకూడదని ఆయన సూచించారు. వార్తల్లో ఉండే వేగం, ఎట్టి పరిస్థితుల్లోనూ అవతలి వ్యక్తి వ్యక్తిత్వ హననానికి దారితీయకూడదని స్పష్టం చేశారు. ‘సామాజిక మాధ్యమాలు - సమాజంపై ప్రభావం’ అనే అంశంపై టీయుడబ్ల్యూజే (TUWJ) ఐజేయు భద్రాద్రి కొత్తగూడెం జిల్లా కమిటీ ఆధ్వర్యంలో భద్రాచలం స్థానిక అక్షయ ఫంక్షన్ హాల్లో బుధవారం ఒక ప్రత్యేక సెమినార్ నిర్వహించారు.

యూనియన్ రాష్ట్ర ప్రధాన కార్యదర్శి కే. రామ్నారాయణ అధ్యక్షతన జరిగిన ఈ సదస్సులో కే. శ్రీనివాసరెడ్డి ముఖ్య అతిథిగా హాజరై ప్రసంగించారు.

సాంకేతికత పెరిగింది.. పరిశీలన తగ్గింది

సమీక్షలో శ్రీనివాసరెడ్డి మాట్లాడుతూ.. మీడియా రంగంలో కాలక్రమేణా అనేక విప్లవాత్మక మార్పులు చోటుచేసుకున్నాయని వివరించారు. ఒకప్పుడు టెలీప్రింటర్, టెలీగ్రాఫ్, ఫాక్స్ ద్వారా సాగిన జర్నలిజం.. ఇంటర్నెట్ పుణ్యమా అని పాఠకునికి అత్యంత వేగంగా సమాచారాన్ని అందిస్తోందన్నారు. ఎలక్ట్రానిక్ మీడియా వచ్చిన తర్వాత నిమిషాల వ్యవధిలో వార్తలు ప్రజలకు చేరాయని, ఇప్పుడు సామాజిక మాధ్యమాలు (Social Media) ఆ వేగాన్ని మరింత పెంచాయని పేర్కొన్నారు.

ప్రింట్ మరియు ఎలక్ట్రానిక్ మీడియాలో వివిధ స్థాయిలలో వార్తలను క్షుణ్ణంగా పరిశీలించిన తర్వాతే తుదిరూపం ఇస్తారని, కానీ సామాజిక మాధ్యమాలలో ఆ పరిశీలన (Gatekeeping) లేకపోవడం వల్ల కొన్నిసార్లు విపత్కర పరిస్థితులు దారితీస్తున్నాయని ఆందోళన వ్యక్తం చేశారు.

అభిప్రాయాలను ఇతరులపై రుద్దవద్దు

వ్యక్తులుగా సామాజిక మాధ్యమాలను నిర్వహించే క్రమంలో చాలామంది తమ వ్యక్తిగత అభిప్రాయాలను, అనుమానాలను, ఆలోచనలను ఇతరులపై రుద్దే ప్రయత్నం చేస్తున్నారని శ్రీనివాసరెడ్డి విమర్శించారు. అందుకే సోషల్ మీడియా వేదికలపై ప్రతి ఒక్కరూ స్వీయ నియంత్రణ పాటించాల్సిన అవసరం ఉందన్నారు. ప్రస్తుతానికి ప్రెస్ కౌన్సిల్ ఆఫ్ ఇండియా (PCI) పరిధిలో ఎలక్ట్రానిక్ మీడియా కూడా లేదని ఈ సందర్భంగా గుర్తుచేశారు. మీడియా ఎల్లప్పుడూ సమాజోన్నతి, దేశ అభివృద్ధి, ప్రజల హక్కుల పరిరక్షణే లక్ష్యంగా ముందుకు సాగాలని పిలుపునిచ్చారు.

ఈ సెమినార్ అనంతరం జర్నలిస్టుల నూతన కమిటీల సన్మాన కార్యక్రమం నిర్వహించి, వారితో ప్రతిజ్ఞ చేయించారు. ఈ ప్రతిష్టాత్మక సదస్సులో ఐజేయు సెక్రెటరీ జనరల్ సోమసుందర్, పినపాక శాసనసభ్యులు పాయం వెంకటేశ్వర్లు, భద్రాచలం శాసనసభ్యులు డాక్టర్ తెల్లం వెంకట్రావు, యూనియన్ నాయకులు మాటేటి వేణుగోపాల్, నేషనల్ కౌన్సిల్ సభ్యులు బి.వి. రమణారెడ్డి, జిల్లా అధ్యక్షులు జాగు వెంకటరత్నం, ప్రధాన కార్యదర్శి జునుమాల రమేష్‌తో పాటు డివిజన్, పట్టణ కమిటీల బాధ్యులు, పెద్ద సంఖ్యలో జర్నలిస్టులు పాల్గొన్నారు.