షాద్నగర్: పవిత్ర శ్రావణమాసాన్ని పురస్కరించుకుని షాద్నగర్ మార్వాడీ సంఘం ఆధ్వర్యంలో మంగళవారం నిర్వహించిన సంప్రదాయ కావడి యాత్ర భక్తి పారవశ్యాన్ని తలపించింది. స్థానిక రామ్ మందిర్ నుంచి ప్రారంభమైన ఈ యాత్రలో భక్తులు కాషాయ వస్త్రాలు ధరించి, పాదరక్షలు లేకుండా ఆధ్యాత్మిక ఉత్సాహంతో కాలినడకన రామేశ్వరం శ్రీ రామలింగేశ్వర స్వామి ఆలయానికి చేరుకున్నారు. దారిపొడవునా శివనామస్మరణతో పరిసరాలు మారుమోగాయి.
ఈ ఆధ్యాత్మిక యాత్రలో మహిళలు, పురుషులు, చిన్నారులు, వృద్ధులు పెద్ద సంఖ్యలో పాల్గొన్నారు. పవిత్ర జలాలను కావడిలో మోసుకుంటూ, గమ్యస్థానం చేరుకునే వరకు కింద పెట్టకుండా తీసుకెళ్లడం ఈ యాత్ర ప్రత్యేకతగా నిలిచింది. మార్గమధ్యలో చౌడమ్మగుట్ట శ్రీ ఆంజనేయస్వామి ఆలయంలో ప్రత్యేక పూజలు నిర్వహించిన అనంతరం, రామేశ్వరం ఆలయానికి చేరుకుని పవిత్ర జలాలతో పరమశివునికి ప్రత్యేక అభిషేకాలు జరిపారు. కుటుంబ సుఖసంతోషాలు, ఆయురారోగ్యాల కోసం భక్తులు స్వామివారిని ప్రార్థించారు.
ఈ సందర్భంగా నిర్వహించిన పూజా కార్యక్రమాల్లో షాద్నగర్ ఎమ్మెల్యే వీర్లపల్లి శంకర్, ఏసీపీ లక్ష్మీనారాయణ, సీఐ సీతారాం, మున్సిపల్ చైర్మన్ అగ్గనూర్ బసవేశ్వర్, వైస్ చైర్మన్ అందే మోహన్ తదితర ప్రజాప్రతినిధులు పాల్గొన్నారు. ప్రతి ఏటా భక్తిశ్రద్ధలతో ఈ సంప్రదాయాన్ని కొనసాగిస్తున్న మార్వాడీ సంఘాన్ని వారు అభినందించారు. యాత్రలో పార్వతీ–పరమేశ్వరుల వేషధారణలోని కళాకారుల ప్రదర్శనలు, మహిళల సాంస్కృతిక విన్యాసాలు ప్రత్యేక ఆకర్షణగా నిలిచాయి.