భద్రాద్రి కొత్తగూడెం: జిల్లా కలెక్టర్ అంకిత్ మంగళవారం సుజాతనగర్ మండలంలో ఆకస్మిక పర్యటన చేపట్టారు. క్షేత్రస్థాయిలో ప్రభుత్వ కార్యక్రమాల అమలు తీరును ఆయన స్వయంగా పర్యవేక్షించారు. ఈ సందర్భంగా సుజాత నగర్ ప్రభుత్వ పాఠశాలను సందర్శించి అక్కడి వసతులు, విద్యాబోధన పనితీరును నేరుగా పరిశీలించారు. అనంతరం రాఘవాపురం గ్రామానికి చేరుకుని, అక్కడ కొనసాగుతున్న ప్రత్యేక సమగ్ర ఓటర్ల జాబితా సవరణ (ఎస్ఐఆర్) ప్రక్రియను తనిఖీ చేశారు.
ఎన్నికల సంఘం నిబంధనలు పాటించాలి
ఓటరు జాబితాలో పేర్ల నమోదు, మార్పులు, చేర్పుల ప్రక్రియపై అధికారులకు కలెక్టర్ అంకిత్ కీలక సూచనలు చేశారు. భారత ఎన్నికల సంఘం (ECI) జారీ చేసిన మార్గదర్శకాల మేరకు ఈ ప్రక్రియను పూర్తిస్థాయి పారదర్శకతతో, కచ్చితమైన నిబంధనలకు అనుగుణంగా నిర్వహించాలని అధికారులను గట్టిగా ఆదేశించారు. ఎలాంటి తప్పులకు ఆస్కారం లేకుండా అర్హులైన ప్రతి ఒక్కరికీ ఓటు హక్కు కల్పించేలా పకడ్బందీగా చర్యలు తీసుకోవాలని స్పష్టం చేశారు.
ప్రజాస్వామ్య బలోపేతానికి సహకరించాలి
ప్రజాస్వామ్య వ్యవస్థను మరింత బలోపేతం చేసే ఈ ఓటరు నమోదు, సవరణ కార్యక్రమానికి ప్రజలందరూ పూర్తిస్థాయిలో సహకరించాలని కలెక్టర్ కోరారు. అర్హులైన ప్రతి ఒక్కరూ జాబితాలో పేర్లు ఉన్నాయో లేదో సరిచూసుకోవాలని, ఏవైనా సవరణలు ఉంటే ఈ అవకాశాన్ని సద్వినియోగం చేసుకోవాలని ఆయన విజ్ఞప్తి చేశారు.