ఆసిఫాబాద్ (కాగజ్ నగర్): తెలంగాణ సాంస్కృతిక వైభవానికి నిదర్శనమైన ఆషాఢ మాస బోనాల జాతర సంబరాలు కుమురం భీం ఆసిఫాబాద్ జిల్లాలో అత్యంత భక్తిశ్రద్ధలతో ఘనంగా ప్రారంభమయ్యాయి. జిల్లా వ్యాప్తంగా ఉన్న శక్తి స్వరూపిణుల ఆలయాలు తొలిరోజే భక్తుల కోలాహలంతో, మంగళ వాయిద్యాల శబ్దాలతో మారుమోగాయి.
జిల్లా కేంద్రంలోని సందీప్ నగర్లో వెలిసిన శ్రీ పోచమ్మ ఆలయం మొదటిరోజు భక్తుల రాకతో కిటకిటలాడింది. తెల్లవారుజాము నుంచే మహిళలు సాంప్రదాయ దుస్తులు ధరించి, పసుపు, కుంకుమ, వేప ఆకులతో అలంకరించిన బోనాలను తలపై మోస్తూ ఆలయానికి చేరుకుని అమ్మవారికి నైవేద్యాలు సమర్పించారు.
కాగజ్ నగర్లో ప్రజాప్రతినిధుల ప్రత్యేక పూజలు
జిల్లాలోని కాగజ్ నగర్ పట్టణంలోనూ బోనాల కోలాహలం ఊపందుకుంది. పట్టణంలోని 30వ వార్డులో గల పోచమ్మ ఆలయాన్ని బీజేపీ మాజీ జిల్లా అధ్యక్షుడు కొత్తపల్లి శ్రీనివాస్, మున్సిపల్ వైస్ చైర్మన్ కొత్తపల్లి అనిత గారలు సందర్శించారు. ఈ సందర్భంగా వారు అమ్మవారికి పట్టువస్త్రాలు, బోనాలు సమర్పించి ప్రత్యేక పూజలు నిర్వహించారు.
అనంతరం వారు మీడియాతో మాట్లాడుతూ.. జిల్లా వ్యాప్తంగా భక్తులు ఎలాంటి ఇబ్బందులు పడకుండా బోనాల ఉత్సవాలను అత్యంత ఘనంగా నిర్వహించడానికి ఆలయ కమిటీల ఆధ్వర్యంలో అన్ని రకాల పూర్తి ఏర్పాట్లు చేసినట్లు వెల్లడించారు.
ఆరోగ్యం కోసమే పోచమ్మకు బోనాల సమర్పణ
ఈ సందర్భంగా బోనాల పండుగ వెనుక ఉన్న పవిత్ర ఆచారాన్ని వారు గుర్తుచేశారు. "సాధారణంగా వర్షాకాలం ప్రారంభంలో అనేక రకాల సీజనల్ వ్యాధులు, అంటువ్యాధులు ప్రబలే అవకాశం ఉంటుంది. ఆ కాలంలో ప్రజలకు, చిన్నపిల్లలకు ఎటువంటి అనారోగ్య సమస్యలు రాకుండా ఊరిని సల్లంగా కాపాడాలని గ్రామాధినేత అయిన పోచమ్మ తల్లికి ప్రత్యేక పూజలు చేసి, బోనాలు సమర్పించడం మన పూర్వీకుల నుండి వస్తున్న బలమైన ఆచారం" అని పేర్కొన్నారు. జిల్లా ప్రజలందరికీ వారు ఆషాఢ మాస బోనాల హృదయపూర్వక శుభాకాంక్షలు తెలియజేశారు.
ఉత్సవాల ప్రారంభం నేపథ్యంలో ఆసిఫాబాద్, కాగజ్ నగర్ పరిధిలోని ప్రధాన అమ్మవారి ఆలయాల వద్ద స్థానిక పోలీసులు భద్రతా ఏర్పాట్లను పర్యవేక్షిస్తున్నారు.