సీయూల్: ఒక దేశం తీవ్రమైన ఆర్థిక సంక్షోభంలో కూరుకుపోయినప్పుడు.. ఆ దేశాన్ని కాపాడుకోవడానికి పాలకుల కంటే అక్కడి సామాన్య ప్రజల ఐక్యత ఎంతటి అద్భుతాలు సృష్టిస్తుందో చెప్పడానికి దక్షిణ కొరియా చరిత్రే ఒక నిదర్శనం. దాదాపు మూడు దశాబ్దాల క్రితం ఆసియా ఖండాన్ని వణికించిన ఆర్థిక సంక్షోభం (Asian Financial Crisis) దక్షిణ కొరియాను తీవ్రంగా దెబ్బతీసింది. విదేశీ మారక నిల్వలు పూర్తిగా క్షీణించడంతో 1997 లో ఆ దేశం దివాలా తీసే పరిస్థితికి చేరుకుంది. ఆ క్లిష్ట సమయంలో అంతర్జాతీయ ద్రవ్య నిధి (IMF) నుండి చరిత్రలోనే అతిపెద్ద బెయిల్ అవుట్ ప్యాకేజీని స్వీకరించాల్సి వచ్చింది. ఆ అప్పుల భారం నుండి దేశాన్ని గట్టెక్కించేందుకు అక్కడి ప్రజలు చేసిన త్యాగం ప్రపంచ చరిత్రలోనే అరుదైన మైలురాయిగా నిలిచిపోయింది.
బ్యాంకుల ముందు బారులు తీరిన 35 లక్షల మంది
దేశ ఆర్థిక పరిస్థితి చేయి దాటిపోతుండటంతో.. తమ వద్ద ఉన్న బంగారాన్ని స్వచ్ఛందంగా ప్రభుత్వానికి అందించి దేశాన్ని ఆదుకోవాలని దక్షిణ కొరియా ప్రభుత్వం పౌరులకు పిలుపునిచ్చింది. ఈ పిలుపునకు దేశవ్యాప్తంగా ఊహించని రీతిలో అపూర్వ స్పందన లభించింది. దేశభక్తితో కదలివచ్చిన సుమారు 35 లక్షల మందికి పైగా సామాన్య ప్రజలు బ్యాంకుల ముందు గంటల తరబడి బారులు తీరారు. తమ పెళ్లి ఉంగరాలు, బంగారు గాజులు, గొలుసులు, కుటుంబ వారసత్వ ఆభరణాలు, కాయిన్స్, చివరకు క్రీడాకారులు తాము సాధించిన ఒలింపిక్ పతకాలను సైతం ప్రభుత్వ నిధికి చేర్చారు.
నాలుగు నెలల్లో 2.1 బిలియన్ డాలర్ల సేకరణ
ఈ చారిత్రాత్మక 'గోల్డ్ కలెక్షన్ మూవ్మెంట్' (Gold Collection Movement) ద్వారా కేవలం నాలుగు నెలల స్వల్ప వ్యవధిలోనే ప్రభుత్వం ఏకంగా 227 టన్నుల బంగారాన్ని సేకరించింది. నాటి అంతర్జాతీయ మార్కెట్ ధరల ప్రకారం దీని విలువ సుమారు 2.1 బిలియన్ డాలర్లకు పైగానే ఉండటం గమనార్హం. సేకరించిన ఈ బంగారాన్ని ప్రభుత్వం వెంటనే కరిగించి అంతర్జాతీయ మార్కెట్లో విక్రయించింది. ఆ విధంగా వచ్చిన నిధులతో ఐఎంఎఫ్ (IMF) కు కట్టాల్సిన విదేశీ రుణాలను సకాలంలో చెల్లించి ఆర్థిక భారాన్ని తగ్గించుకుంది.
ప్రజలు చూపిన ఈ అసమాన ఐక్యత, త్యాగనిరతి అంతర్జాతీయ పెట్టుబడిదారులను విపరీతంగా ఆకర్షించాయి. దేశంపై నమ్మకంతో విదేశీ పెట్టుబడులు మళ్లీ వరదలా పారాయి. ఫలితంగా ఆ ఘోర సంక్షోభం నుండి దక్షిణ కొరియా అతి వేగంగా కోలుకోవడమే కాకుండా.. కొద్ది సంవత్సరాల్లోనే ప్రపంచంలోని అగ్రశ్రేణి ఆర్థిక శక్తులలో ఒకటిగా అవతరించింది.