పేపర్ లీక్ మాఫియాను వదిలిపెట్టేది లేదు.. పార్లమెంట్‌లో బిల్లు ఆమోదంపై ప్రధాని మోదీ సంచలన వ్యాఖ్యలు

న్యూఢిల్లీ: దేశంలో కొన్ని దశాబ్దాలుగా కేంద్ర, రాష్ట్ర ప్రభుత్వాలను వేధిస్తున్న పేపర్ లీకేజీల సమస్యకు శాశ్వత పరిష్కారం చూపేందుకు మోదీ ప్రభుత్వం సమరశంఖం పూరించింది. విద్యార్థుల భవిష్యత్తుతో ఆడుకునే పేపర్ లీక్ మాఫియా, క్రిమినల్ గ్యాంగ్‌లపై కఠిన చర్యలు తీసుకునేందుకు వీలుగా రూపకల్పన చేసిన ‘యాంటీ పేపర్ లీక్ బిల్లు’ (పరీక్షల్లో అక్రమాల నిరోధక బిల్లు) పార్లమెంట్ ఉభయ సభల ఆమోదం పొందింది. ఈ సందర్భంగా ప్రధాని నరేంద్ర మోదీ సోషల్ మీడియా వేదికగా ఒక ప్రత్యేక వీడియో సందేశాన్ని పంచుకున్నారు.

విశ్వసనీయమైన పరీక్షా విధానమే లక్ష్యం

ప్రధాని మోదీ తన సందేశంలో మాట్లాడుతూ.. "మిత్రులారా, విశ్వసనీయమైన పరీక్షా విధానాన్ని నెలకొల్పేందుకు మనం వరుసగా ఒకదాని తర్వాత ఒకటి విప్లవాత్మక నిర్ణయాలు తీసుకుంటున్నాం. దీనికోసం ప్రత్యేక టాస్క్ ఫోర్స్‌ల ఏర్పాటు, ఫాస్ట్ ట్రాక్ వ్యవస్థలు, వివిధ రాష్ట్రాల నుంచి వచ్చిన కీలక సూచనలను పరిగణనలోకి తీసుకున్నాం. ఎందుకంటే గత కొన్నేళ్లుగా కేంద్రంతో పాటు ప్రతి రాష్ట్రం ఈ పేపర్ లీక్‌ల సమస్యతో సతమతమవుతోంది. ఇది మన దేశ పిల్లల భవిష్యత్తును తీవ్ర ముప్పులోకి నెట్టివేస్తోంది" అని ఆందోళన వ్యక్తం చేశారు.

సాంకేతికత వినియోగం.. కఠిన చట్టాలు

మారుతున్న కాలానికి అనుగుణంగా విద్యా వ్యవస్థలో సంస్కరణలు అనివార్యమయ్యాయని ప్రధాని పునరుద్ఘాటించారు. పరీక్షల నిర్వహణలో అత్యాధునిక సాంకేతిక పరిజ్ఞానాన్ని (Technological tools) విస్తృతంగా ఉపయోగించాల్సిన అవసరం ఉందన్నారు. ఇకపై ఏ పేపర్ మాఫియా లేదా లీకేజీ ముఠాలు దేశ యువత భవిష్యత్తుతో ఆడుకోవడానికి వీలు లేకుండా చట్టపరంగా కఠిన చర్యలు ఉంటాయని, ఎవరినీ బక్షించేది లేదని స్పష్టం చేశారు.

ఉభయ సభల్లో విస్తృత చర్చ – బిల్లుకు ఆమోదం

"నేను మీకు ఇచ్చిన మాట ప్రకారం.. పార్లమెంట్‌లో చట్టబద్ధమైన బిల్లును ప్రవేశపెట్టాం. గత రెండు రోజులుగా పార్లమెంట్ ఉభయ సభల్లోని అత్యధిక సంఖ్యలో ఎంపీలు దీనిపై సుదీర్ఘంగా, విస్తృతంగా చర్చించారు. ఈరోజు అత్యంత కఠిన నిబంధనలు, నిబంధనావళితో కూడిన ఈ బిల్లును ఉభయ సభలు విజయవంతంగా ఆమోదించాయి. పారదర్శక పరీక్షల దిశగా మనం వేసిన ఈ అడుగు అత్యంత కీలకమైనది. ఈ దిశగా పనులు ఇక్కడితో ఆగవు, నిరంతరం కొనసాగుతాయి. ఇలాంటి దుస్థితిని మనం ఇకపై ఎంతమాత్రం సాగనీయం" అని ప్రధాని ధీమా వ్యక్తం చేశారు.

వికసిత్ భారత్ (అభివృద్ధి చెందిన భారత్) స్వప్నాన్ని సాకారం చేసుకునేందుకు దేశ ప్రజలంతా తోడుగా ముందుకు సాగాలని, భుజం భుజం కలిపి నడవాలని ప్రధాని మోదీ ఈ సందర్భంగా పిలుపునిచ్చారు.