కోదాడ ప్రమాదం వెనుక దారుణం.. సీసీ ఫుటేజీతో తేలిన హత్య నిజం

పోలీసుల దర్యాప్తు వివరాల ప్రకారం.. గత నెల 30వ తేదీన కోదాడలోని ఒక స్థానిక బార్‌లో మహేష్, రమేష్ అనే ఇద్దరు యువకులు మద్యం సేవిస్తూ తీవ్రంగా గొడవ పడ్డారు. అదే సమయంలో అక్కడ ఉన్న యాకూబ్ అనే వ్యక్తి జోక్యం చేసుకుని, వారిద్దరికీ నచ్చజెప్పి గొడవను సద్దుమణిగించాడు. అనంతరం యాకూబ్ బార్ నుండి బయటకు వచ్చి మేళ్లచెరువు రోడ్డు సిగ్నల్ సమీపంలో నడుచుకుంటూ వెళ్తున్నాడు. అయితే తమ గొడవలో అనవసరంగా జోక్యం చేసుకున్నాడనే కోపంతో మహేష్ అనే యువకుడు యాకూబ్‌ను వెంబడించాడు.

యాకూబ్ రోడ్డుపై నడుచుకుంటూ వెళ్తుండగా.. వెనుక నుండి వేగంగా వచ్చిన మహేష్ అతడిని కాలితో బలంగా తన్నాడు. ఆ దెబ్బకు యాకూబ్ రోడ్డుపై పడిపోయాడు. సరిగ్గా అదే సమయంలో పక్క నుండి వెళ్తున్న ఒక లారీ వెనుక చక్రాలు యాకూబ్ శరీరంపై నుండి దూసుకెళ్లడంతో అతడు తీవ్రంగా గాయపడ్డాడు. స్థానికులు వెంటనే ఆసుపత్రికి తరలించినప్పటికీ, చికిత్స పొందుతూ యాకూబ్ ప్రాణాలు కోల్పోయాడు.

ప్రమాదం జరిగిన తక్షణమే నిందితుడు మహేష్ చాలా తెలివిగా ఈ నేరాన్ని లారీ డ్రైవర్ పైకి నెట్టేందుకు ప్రయత్నించాడు. పోలీసులు సైతం ప్రాథమిక సమాచారం మేరకు లారీ డ్రైవర్ నిర్లక్ష్యం కిందనే కేసు నమోదు చేయాలని భావించారు.

ఈ మరణంపై అనుమానం వచ్చిన పోలీసులు ఘటనా స్థలంలో ఉన్న సీసీ కెమెరాలను క్షుణ్ణంగా పరిశీలించారు. మహేష్ వెనుక నుండి వచ్చి యాకూబ్‌ను కాలితో తన్నడం, ఆపై లారీ కింద పడిపోవడం వంటి దృశ్యాలన్నీ సీసీ ఫుటేజీలో స్పష్టంగా రికార్డయ్యాయి. దీంతో ఇది ప్రమాదం కాదని, పక్కా ప్లాన్‌తో చేసిన హత్య (Murder) అని నిర్ధారించుకున్న పోలీసులు నిందితుడు మహేష్‌ను అదుపులోకి తీసుకున్నారు. లారీ డ్రైవర్‌పై పెట్టిన కేసును రద్దు చేసి, మహేష్‌పై హత్య కేసు నమోదు చేసి రిమాండ్‌కు తరలించారు. ఈ దారుణ ఘటన స్థానికంగా తీవ్ర సంచలనం సృష్టించింది.