బీఆర్ఎస్ పార్లమెంటరీ పార్టీ నేతగా ఎంపీ వద్దిరాజు రవిచంద్ర.. కేసీఆర్ కీలక నిర్ణయం

హైదరాబాద్: భారత రాష్ట్ర సమితి (బీఆర్ఎస్) అధినేత, మాజీ ముఖ్యమంత్రి కల్వకుంట్ల చంద్రశేఖర రావు (కేసీఆర్) పార్లమెంటరీ పరిధిలో కీలక నియామకం చేపట్టారు. బీఆర్ఎస్ రాజ్యసభ సభ్యుడు వద్దిరాజు రవిచంద్రను బీఆర్ఎస్ పార్లమెంటరీ పార్టీ (BRSPP) లీడర్‌గా నియమిస్తూ గురువారం అధికారిక నిర్ణయం తీసుకున్నారు. దీనితో పాటు రాజ్యసభలో బీఆర్ఎస్ పక్ష నేత బాధ్యతలను కూడా ఆయనే నిర్వహించనున్నారు.

ప్రస్తుతం బీఆర్ఎస్ పార్లమెంటరీ పార్టీ ఉప నేతగా (డిప్యూటీ లీడర్) బాధ్యతలు నిర్వహిస్తున్న వద్దిరాజు రవిచంద్రను, సీనియారిటీ ప్రాతిపదికన అత్యున్నత స్థానానికి కేసీఆర్ ఎంపిక చేశారు.

సురేష్ రెడ్డి రిటైర్మెంట్‌తో నూతన బాధ్యతలు

పార్లమెంటులో బీఆర్ఎస్ పార్టీకి సంబంధించి రాజ్యసభలో ప్రస్తుతం నలుగురు సభ్యులు ప్రాతినిధ్యం వహిస్తున్నారు. వారిలో కేఆర్. సురేష్ రెడ్డి, దీవకొండ దామోదర్ రావు, డాక్టర్ బండి పార్థసారథి రెడ్డి మరియు వద్దిరాజు రవిచంద్ర ఉన్నారు. ఇప్పటివరకు బీఆర్ఎస్ పార్లమెంటరీ పార్టీ నేతగా వ్యవహరించిన సీనియర్ నేత కేఆర్. సురేష్ రెడ్డి పదవీ కాలం ఇటీవల ముగిసి (రిటైర్) కావడం వల్ల ఆ స్థానంలో వద్దిరాజు రవిచంద్రను నియమించారు.

2030 ఏప్రిల్ వరకు పదవీ కాలం

ప్రముఖ పారిశ్రామికవేత్త, సామాజికవేత్త అయిన వద్దిరాజు రవిచంద్ర పదవీ కాలం సుదీర్ఘంగా 2030 ఏప్రిల్ నెల వరకు ఉంది. దానికి తోడు ఢిల్లీ స్థాయిలో ఆయనకు ఉన్న పరిచయాలు, పార్లమెంటరీ వ్యవహారాలపై ఉన్న పట్టును పరిగణనలోకి తీసుకుని పార్టీ అధినేత కేసీఆర్ ఈ బాధ్యతలు అప్పగించారు. వద్దిరాజు రవిచంద్ర ప్రస్తుతం పార్లమెంట్‌కు సంబంధించిన పెట్రోలియం మరియు సహజవాయువు పార్లమెంటరీ స్థాయీ సంఘం (Standing Committee) సభ్యుడిగా, అలాగే బొగ్గు, గనుల శాఖ సంప్రదింపుల కమిటీ సభ్యుడిగా కూడా సేవలందిస్తున్నారు.

బీఆర్ఎస్ పార్లమెంటరీ పార్టీ నేతగా అధినేత కేసీఆర్ చేతుల మీదుగా నియామక పత్రం అందుకున్న ఎంపీ వద్దిరాజు రవిచంద్రకు పార్టీ ప్రజాప్రతినిధులు, ముఖ్య నేతలు మరియు కార్యకర్తలు పెద్ద ఎత్తున శుభాకాంక్షలు తెలియజేశారు. పార్లమెంట్‌లో తెలంగాణ హక్కుల సాధన కోసం, ప్రజా సమస్యలపై పార్టీ తరఫున గళం విప్పుతానని ఈ సందర్భంగా వద్దిరాజు రవిచంద్ర స్పష్టం చేశారు.