హైదరాబాద్: రంగారెడ్డి జిల్లా రాజేంద్రనగర్ నియోజకవర్గ పరిధిలోని శంషాబాద్ రాజీవ్ గాంధీ అంతర్జాతీయ విమానాశ్రయం నుంచి ఢిల్లీ పర్యటనకు బయలుదేరిన కేంద్ర హోంశాఖ సహాయ మంత్రి బండి సంజయ్ కుమార్ మీడియాతో చిట్చాట్ చేశారు. ఈ సందర్భంగా రాష్ట్రంలో కాంగ్రెస్ పాలన, ఆర్థిక పరిస్థితి మరియు రాజకీయ పరిణామాలపై ఆయన తీవ్రస్థాయిలో ధ్వజమెత్తారు. రాష్ట్ర అభివృద్ధికి కేంద్ర ప్రభుత్వంతో ఘర్షణ వైఖరి ఏమాత్రం మంచిది కాదని బండి సంజయ్ హితవు పలికారు.
రెండేళ్లలోనే రెండున్నర లక్షల కోట్ల అప్పులు
రాష్ట్ర ఆర్థిక పరిస్థితిపై మాట్లాడుతూ.. గతంలో కేసీఆర్ ప్రభుత్వం పదేళ్ల పాలనలో రూ. 8 లక్షల కోట్ల అప్పులు చేసి రాష్ట్రాన్ని దివాళా తీయిస్తే, ప్రస్తుత రేవంత్ రెడ్డి ప్రభుత్వం అధికారంలోకి వచ్చిన రెండున్నరేళ్ల వ్యవధిలోనే ఏకంగా రూ. 2.5 లక్షల కోట్ల అప్పులు చేసి ప్రజలపై భారం మోపిందని ఆరోపించారు. కాంగ్రెస్ పార్టీకి నిజాయితీ ఉంటే, కేబినెట్లో ఖాళీగా ఉన్న రెండు మంత్రి పదవులను యువ నాయకులకు కేటాయించి తమ కట్టుబడిని నిరూపించుకోవాలని సవాల్ విసిరారు.
విహెచ్కి అన్యాయం.. జెన్జీ (GenZ) యువతను మోసం చేస్తున్నారు
కాంగ్రెస్ సీనియర్ నాయకుడు వి. హనుమంతరావుకు ఆ పార్టీ తీవ్ర అన్యాయం చేస్తోందని బండి సంజయ్ వ్యాఖ్యానించారు. పార్టీ కోసం పనిచేసిన హనుమంతరావుకు న్యాయం చేసే చిత్తశుద్ధి కాంగ్రెస్కు లేదన్నారు. అలాగే, రాహుల్ గాంధీ ఎప్పటికీ దేశానికి ప్రధాని కాలేరనే నిజాన్ని సీఎం రేవంత్ రెడ్డితో పాటు రాహుల్ కూడా గ్రహించారని వ్యంగ్యాస్త్రాలు విసిరారు. కాంగ్రెస్ పార్టీ నయా తరం (GenZ) యువతను ఓట్ల కోసం వాడుకుని మోసం చేస్తోందని, ఈ విషయాన్ని రాష్ట్ర యువత గమనించి గుణపాఠం చెప్పాలని పిలుపునిచ్చారు.