ఇబ్రహీంపట్నం: గణేష్ విగ్రహాల తుది నిమజ్జన వేడుకలను అత్యంత ప్రశాంత వాతావరణంలో, ఎలాంటి అవాంఛనీయ సంఘటనలు జరగకుండా కట్టుదిట్టమైన భద్రతా చర్యల మధ్య నిర్వహించేందుకు పోలీసులు సర్వం సిద్ధం చేశారు. ఇందులో భాగంగా ఫ్యూచర్ సిటీ పోలీస్ కమిషరేట్ పరిధిలో అన్ని రకాల మద్యం విక్రయ కేంద్రాలను పూర్తిగా మూసివేయాలని పోలీస్ కమిషనర్ డా. తరుణ్ జోషి, ఐపీఎస్ స్పష్టమైన ఆదేశాలు జారీ చేశారు.
ప్రజా శాంతిభద్రతల పరిరక్షణ మరియు శాంతియుత వాతావరణాన్ని కాపాడే ప్రధాన ఉద్దేశంతో.. తెలంగాణ రాష్ట్ర ఎక్సైజ్ చట్టం–1968లోని సెక్షన్ 20 కింద ఈ మేరకు అధికారిక నోటిఫికేషన్ విడుదల చేశారు. జారీ చేసిన ఉత్తర్వుల ప్రకారం.. ఈ నెల 25వ తేదీ ఉదయం 6:00 గంటల నుంచి 26వ తేదీ ఉదయం 6:00 గంటల వరకు ఫ్యూచర్ సిటీ కమిషరేట్ పరిధిలోని అన్ని వైన్ షాపులు, కల్లు దుకాణాలు, బార్లు (రెస్టారెంట్లకు అనుబంధంగా ఉన్నవి) పూర్తిగా మూసివేయాల్సి ఉంటుంది. అయితే నిబంధనల ప్రకారం స్టార్ హోటళ్లలోని బార్లు మరియు అధికారికంగా రిజిస్టర్డ్ అయిన క్లబ్బులకు మాత్రం ఈ మద్యం నిషేధ ఆదేశాల నుంచి ప్రత్యేక మినహాయింపునిచ్చారు.
నిమజ్జనోత్సవం ప్రశాంతంగా ముగిసేందుకు సంబంధిత వైన్ షాపుల యాజమాన్యాలు, బార్ల నిర్వాహకులు ఈ నిర్ణీత సమయ నిబంధనలను కచ్చితంగా పాటించి పోలీసు శాఖకు పూర్తి సహకారం అందించాలని ఫ్యూచర్ సిటీ పోలీసులు గట్టిగా సూచించారు. నిబంధనలను ఉల్లంఘించి ఎవరైనా దుకాణాలు తెరిస్తే వారిపై చట్టపరంగా కఠిన చర్యలు ఉంటాయని హెచ్చరించారు.