ఎల్బీనగర్: ఎల్బీనగర్ నియోజకవర్గంలో బీసీ కులాల సమన్వయ వేదిక అధ్యక్షులు బొమ్మ రఘురాం నేత ఆధ్వర్యంలో తెలంగాణ ఉద్యమ నేత, స్వాతంత్ర్య సమరయోధుడు, సామాజిక న్యాయం కోసం జీవితాంతం పోరాడిన ఆచార్య కొండా లక్ష్మణ్ బాపూజీ వర్ధంతి వేడుకలను అత్యంత ఘనంగా నిర్వహించారు. ఈ కార్యక్రమంలో పలు బీసీ, బహుజన సంఘాల నాయకులు, ప్రతినిధులు పాల్గొని బాపూజీ చిత్రపటానికి పూలమాలలు వేసి నివాళులర్పించారు.
ఈ సందర్భంగా బీసీ పీపుల్స్ ఫెడరేషన్ రాష్ట్ర అధ్యక్షుడు బొంగు వెంకటేష్ గౌడ్ మాట్లాడుతూ.. కొండా లక్ష్మణ్ బాపూజీ గారు కేవలం ఒక సాధారణ రాజకీయ నాయకుడు కాదని, ప్రజా ఉద్యమాల కోసం తన పూర్తి జీవితాన్ని అంకితం చేసిన మహోన్నత వ్యక్తి అని కొనియాడారు. వాంకిడి ప్రాంతంలో జన్మించిన బాపూజీ గారు పద్మశాలి సామాజిక నేపథ్యం నుంచి వచ్చి, చిన్ననాటి నుంచే పేదలు, వెనుకబడిన వర్గాలు, చేతివృత్తుల ప్రజలు ఎదుర్కొంటున్న సమస్యలను దగ్గరగా చూశారని తెలిపారు. సర్దార్ సర్వాయి పాపన్న గౌడ్ రాష్ట్ర అధ్యక్షులు అంబాల మల్లేష్ గౌడ్ మాట్లాడుతూ.. ఆయన అడ్వకేట్‌గా (న్యాయవాదిగా) ప్రాక్టీస్ చేస్తూనే ప్రజా సమస్యలపై గళమెత్తారని, బీసీలు, చేతివృత్తుల ప్రజల ఆర్థిక, సామాజిక అభివృద్ధి కోసం సహకార సంఘాల ఏర్పాటుకు విశేషంగా కృషి చేశారని గుర్తుచేశారు. బలహీన వర్గాల హక్కుల పరిరక్షణ కోసం ఆయన చేసిన కృషి నేటి తరానికి ఎంతో స్ఫూర్తిదాయకమని అన్నారు.
1967లో కేబినెట్ మంత్రిగా బాధ్యతలు నిర్వహిస్తున్న సమయంలోనే ప్రత్యేక తెలంగాణ రాష్ట్ర సాధన ఉద్యమం ఉధృతమైన నేపథ్యంలో.. 1969 మార్చి 27న మంత్రి పదవికి రాజీనామా చేసి తెలంగాణ కోసం తన పదత్యాగం చేసిన గొప్ప చరిత్ర ఆయన సొంతమని వక్తలు గుర్తుచేశారు. అధికారాన్ని కాపాడుకోవడం కంటే తెలంగాణ ప్రజల ఆకాంక్షలకే ప్రాధాన్యత ఇచ్చిన నిస్వార్థ నాయకుడిగా ఆయన చరిత్రలో నిలిచిపోయారని కొనియాడారు. తెలంగాణ కోసం పోరాడిన ఉద్యమకారుల త్యాగాలను నేటి తరానికి సవివరంగా తెలియజేయాల్సిన బాధ్యత మన అందరిపై ఉందని స్పష్టం చేశారు. అలాగే బాపూజీ గారు బీసీలు, బహుజనులు, పేదలు, బలహీన వర్గాల ఆత్మగౌరవం, సామాజిక న్యాయం కోసం ఏ సిద్ధాంతాలకైతే పోరాడారో, వాటిని ముందుకు తీసుకెళ్లడమే ఆయనకు అర్పించే నిజమైన నివాళి అని నాయకులు పేర్కొన్నారు.