షాద్‌నగర్:మూఢనమ్మకాలు, సామాజిక విచక్షతలను పూర్తిగా అధిగమించి కేవలం విద్య ద్వారానే సమసమాజ స్థాపన సాధ్యమవుతుందని షాద్‌నగర్ శాసనసభ్యులు, రాష్ట్ర ప్రభుత్వ రంగ సంస్థల కమిటీ చైర్మన్ వీర్లపల్లి శంకర్ అన్నారు. విద్యాశాఖ అధికారుల చొరవ మరియు దాతల ఉదారతతో షాద్‌నగర్ పట్టణం హజీపల్లి శివారులోని సిండికేట్ కాలనీలో పేద విద్యార్థుల చదువు కోసం నిర్మించతలపెట్టిన నూతన పాఠశాల భవన నిర్మాణ పనులను బుధవారం ఎమ్మెల్యే వీర్లపల్లి శంకర్ ముఖ్య అతిథిగా విచ్చేసి ప్రారంభించారు. స్థానిక సర్పంచ్ కుమార్ అధ్యక్షతన నిర్వహించిన ఈ ప్రత్యేక కార్యక్రమంలో మున్సిపల్ చైర్మన్, వైస్ చైర్మన్, ఎంఈఓ, కౌన్సిలర్లు, కాంగ్రెస్ నాయకులు, స్థానిక విలేకరులు, కాలనీవాసులు హాజరయ్యారు.
ఈ సందర్భంగా ఎమ్మెల్యే మాట్లాడుతూ.. ప్రాచీన కాలం నుండి నెలకొన్న అసమానతల వల్ల ఎన్నో కులాలు, పేద వర్గాలు విద్యకు నోచుకోలేదని, స్వాతంత్ర్యం అనంతరం డాక్టర్ బి.ఆర్. అంబేద్కర్ అందించిన రాజ్యాంగం ద్వారానే అందరికీ సమాన విద్యావకాశాలు లభించాయని గుర్తుచేశారు. 'విద్య లేనివాడు వింత పశువు' అనే నానుడిని ప్రస్తావిస్తూ, అక్షర విద్య ద్వారానే ఆర్థిక, సామాజిక పురోగతితో పాటు సమాజంలో గౌరవప్రదమైన జీవితం సాధ్యమవుతుందని పేర్కొన్నారు. సిండికేట్ కాలనీలోని పలు నిరుపేద కుటుంబాలు తీవ్ర ఆర్థిక ఇబ్బందుల వల్ల తమ పిల్లలను బడికి పంపలేక అవస్థలు పడుతున్న వైనాన్ని గుర్తించి, వారిని మళ్లీ బడిబాట పట్టించేందుకు విద్యాశాఖ ఉన్నతాధికారులు యుద్ధప్రాతిపదికన ప్రత్యేక సర్వే చేపట్టడం ఎంతో అభినందనీయమని కొనియాడారు. బడికి దూరమైన ప్రతి పేద విద్యార్థిని గుర్తించి నాణ్యమైన విద్యనందించడమే లక్ష్యంగా విద్యాశాఖ కృషి చేస్తోందని అన్నారు.
"పుట్టుకతో ఎవరూ గొప్పవారు కాదు. పేద విద్యార్థుల జీవితాల్లో వెలుగులు నింపేందుకు, మట్టిలోని మాణిక్యాలను వెలికితీసేందుకు ప్రజాప్రతినిధులు, దాతలు స్వచ్ఛందంగా ముందుకు రావడం గర్వకారణం" అని ఎమ్మెల్యే అన్నారు. ఇప్పటికే దాదాపు 50 మంది దాతలు రూ.5000 మొదలుకొని రూ.5 లక్షల వరకు తమవంతు ఆర్థిక సాయాన్ని అందించారని, మరింత మంది దాతలు విరాళాలు అందించడానికి ముందుకు వస్తున్నారని తెలిపారు. విద్యార్థులకు అవసరమైన పుస్తకాలు, దుస్తులు, స్కూల్ బ్యాగులు, మధ్యాహ్న భోజన వసతులతో పాటు పాఠశాల మౌలిక వసతులను మరింత మెరుగుపరుస్తామని హామీ ఇచ్చారు. కేవలం పిల్లల చదువుకే పరిమితం కాకుండా, వారి తల్లిదండ్రులు స్వయంశక్తితో బతికేందుకు వీలుగా వృత్తిపరమైన సహాయసహకారాలు కూడా అందిస్తామని ఈ సందర్భంగా ఎమ్మెల్యే ప్రకటించారు.
సామాజిక బాధ్యతతో పేద విద్యార్థుల భవిష్యత్తు కోసం ముందుకు వచ్చిన విలేకరులు, విద్యాశాఖ అధికారులు, సర్పంచ్, పార్టీ నాయకులు మరియు దాతలందరికీ ఆయన ప్రత్యేక ధన్యవాదాలు తెలిపారు. తల్లిదండ్రులు ఈ సువర్ణావకాశాన్ని సద్వినియోగం చేసుకొని, తమ పిల్లలను మంచిగా చదివించాలని పిలుపునిచ్చారు. పాఠశాల నిర్మాణ పనులు ప్రారంభం కావడంతో కాలనీవాసులు, విద్యార్థుల తల్లిదండ్రులు హర్షం వ్యక్తం చేశారు.