ఆమనగల్: రంగారెడ్డి జిల్లా ఆమనగల్ మండలంలో 11వ ఆయుర్వేద దినోత్సవాన్ని పురస్కరించుకుని స్థానిక ప్రభుత్వ హోమియో డిస్పెన్సరీలో బుధవారం ఆయుర్వేద దినోత్సవ వేడుకలను అత్యంత ఘనంగా నిర్వహించారు. డాక్టర్ శ్రీకాంత్ ఆధ్వర్యంలో నిర్వహించిన ఈ కార్యక్రమానికి కౌన్సిలర్ మహేష్ ముఖ్య అతిథిగా విచ్చేశారు.
ఈ సందర్భంగా వారు మాట్లాడుతూ.. ప్రాచీన వైద్య విధానమైన ఆయుర్వేదం ద్వారా ఆరోగ్య పరిరక్షణపై ప్రజల్లో మరింత అవగాహన పెంపొందించాల్సిన అవసరం ఎంతైనా ఉందని పేర్కొన్నారు. నేటి ఉరుకులు పరుగుల జీవితంలో ప్రజలు ఎదుర్కొంటున్న ఆరోగ్య సమస్యలకు ఆయుర్వేదం చక్కటి పరిష్కారం చూపుతుందని, ప్రజల ఆరోగ్యం మరియు సంక్షేమం కోసం ఈ వైద్య విధానాన్ని మరింత విస్తృతంగా ప్రజలకు చేరువ చేయాలని ఆకాంక్షించారు. ఈ కార్యక్రమంలో ఆయుర్వేద, హోమియో వైద్య విధానాల విశిష్టతను సిబ్బంది వివరించారు.
ఈ కార్యక్రమంలో మంగళపల్లి ఉపసర్పంచ్ శ్రీను, సీహెచ్‌సీ (CHC) వైద్యులు డాక్టర్ ఊర్మిళ, డాక్టర్ స్వాతి, ఫార్మసిస్టులు సత్యమ్మ, ఇందిర, హెచ్‌ఓ తిరుపతిరెడ్డి, ఉమాపతి, లక్ష్మి, ల్యాబ్ టెక్నీషియన్ వేణుతో పాటు శ్రీను, గుజ్జరి శ్రీను, నరేష్, గోపాల్‌రెడ్డి, సాయి తదితరులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.