కొల్లాపూర్: సామాజిక న్యాయం, సమాన రాజకీయ ప్రాతినిధ్యం మరియు అణగారిన వర్గాల రాజ్యాధికార సాధనే లక్ష్యంగా తెలంగాణ రక్షణ సేన పార్టీ పనిచేస్తుందని కొల్లాపూర్ నియోజకవర్గ ఇన్చార్జ్ పగిడాల శ్రావణి తెలిపారు. స్థానిక ముదిరాజ్ సంఘం భవనంలో ఏర్పాటు చేసిన విలేకరుల సమావేశంలో ఆమె మాట్లాడారు.
నల్లమల ముద్దుబిడ్డలు ఉద్యమ బాట పట్టాలి
తెలంగాణ సాధన కోసం ఎంతోమంది ప్రాణాలర్పించినా, గత బిఆర్ఎస్ పాలనలో ప్రజలకు, యువతకు సరైన అవకాశాలు దక్కలేదని శ్రావణి ఆరోపించారు. కొల్లాపూర్ ప్రాంతంలో వనరులు ఉన్నా పరిశ్రమలు లేక నేటికీ ప్రజలు వలసలు వెళ్తున్నారని ఆవేదన వ్యక్తం చేశారు. సామాజిక తెలంగాణ సాధన కోసం కొల్లాపూర్ ప్రజలు ఉద్యమ బాట పట్టాలని పిలుపునిచ్చారు.
ఆగస్టు 6న సరూర్నగర్లో భారీ సంకల్ప సభ
ప్రొఫెసర్ జయశంకర్ జయంతిని పురస్కరించుకుని ఆగస్టు 6న హైదరాబాద్లోని సరూర్నగర్ ఇండోర్ స్టేడియంలో నిర్వహించనున్న 'రాష్ట్రస్థాయి సామాజిక న్యాయ తెలంగాణ సంకల్ప సభ'ను విజయవంతం చేయాలని కోరారు. పార్టీ రాష్ట్ర అధ్యక్షురాలు కల్వకుంట్ల కవిత నాయకత్వంలో జరుగుతున్న ఈ సభ బిసి, ఎస్సీ, ఎస్టీ, మైనారిటీ, మహిళా వర్గాల రాజ్యాధికార వాటా కోసం గళమెత్తుతుందని శ్రావణి స్పష్టం చేశారు.