వెబ్ డెస్క్: దుబాయ్ నుంచి ఇజ్రాయెల్ బయలుదేరిన ఫ్లైదుబాయ్ విమానంలో కో-పైలట్ చేసిన ప్రమాదకర కుట్రను సమర్థవంతంగా తిప్పికొట్టి, సుమారు 180 మంది ప్రయాణికుల ప్రాణాలను కాపాడిన భారతీయ పైలట్ స్మిత్ మచ్చర్‌ (Captain Smit Machchhar)ను దేశ అత్యున్నత శాంతిభద్రతల శౌర్య పురస్కారమైన ‘అశోక చక్ర’ అవార్డుతో సత్కరించే ఆలోచనలో భారత ప్రభుత్వం ఉన్నట్లు సమాచారం. అత్యంత క్లిష్ట పరిస్థితుల్లోనూ అసాధారణ ధైర్యసాహసాలు ప్రదర్శించిన మచ్చర్‌పై ప్రస్తుతం ప్రపంచవ్యాప్తంగా ప్రశంసల వెల్లువ కురుస్తోంది. భారత ప్రధాని నరేంద్ర మోదీతో పాటు అమెరికా అధ్యక్షుడు ట్రంప్, ఇజ్రాయెల్ ప్రధాని నెతన్యాహు కూడా ఆయన సాహసాన్ని కొనియాడుతూ హీరోగా అభివర్ణించారు.
విశిష్ట గుజరాత్ గిరిమ అవార్డు..
గుజరాతీ మూలాలు ఉన్న ఈ సాహస పైలట్‌కు ఇప్పటికే గుజరాత్ ప్రభుత్వం ‘విశిష్ట గుజరాత్ గిరిమ’ అవార్డును ప్రకటించింది. ఆయన త్వరగా కోలుకోవాలని ఆకాంక్షిస్తూ సోమనాథ్ ఆలయం, కాశీ విశ్వనాథ్ ఆలయాల్లో ప్రత్యేక పూజలు నిర్వహించారు. ఒకవేళ స్మిత్ మచ్చర్‌కు అశోక చక్ర లభిస్తే, ఈ పురస్కారాన్ని అందుకున్న రెండో ఏవియేషన్ వ్యక్తిగా ఆయన చరిత్ర సృష్టిస్తారు. గతంలో 1987లో పాన్ ఆమ్ ఫ్లైట్ 73 హైజాక్ సమయంలో ప్రయాణికులను రక్షించి ప్రాణత్యాగం చేసిన సీనియర్ ఫ్లైట్ పర్సర్ నీరజ్ భానోత్‌కు మరణానంతరం అశోక చక్ర లభించింది. ప్రస్తుత ఘటనలోనూ అదే స్థాయి తెగువ చూపిన స్మిత్ మచ్చర్‌కు ఈ అవార్డు దక్కనుందన్న వార్తలు ప్రాధాన్యత సంతరించుకున్నాయి.