శంషాబాద్: గ్రేటర్ హైదరాబాద్ శంషాబాద్ జోన్ పరిధిలోని ఆదర్శనగర్లో గల ఎస్ఎస్ఆర్ కన్వెన్షన్లో 12వ తెలంగాణ ఓపెన్ ఇంటర్ డిస్ట్రిక్ట్ ఎక్విప్డ్ పవర్ లిఫ్టింగ్ ఛాంపియన్షిప్-2026 పోటీలు శనివారం ఘనంగా ప్రారంభమయ్యాయి. బండ పరమేశ్వర్ యాదవ్ జ్ఞాపకార్థం 'యాదవ్ ఫిట్నెస్ జిమ్' ఆధ్వర్యంలో ఈ రాష్ట్రస్థాయి పోటీలను నిర్వహించారు. రాజేంద్రనగర్ ఎమ్మెల్యే ప్రకాష్ గౌడ్ ముఖ్య అతిథిగా హాజరై జ్యోతి ప్రజ్వలన చేసి పోటీలను అధికారికంగా ప్రారంభించారు.
తొలిరోజు విజేతలకు భారీ నగదు బహుమతులు
పోటీల మొదటి రోజున 59 కేజీల విభాగంలో పవర్ లిఫ్టర్లు తమ ప్రతిభను చాటారు. ఈ విభాగంలో విజేతలుగా నిలిచిన వారికి స్పాన్సర్లు, మాజీ కౌన్సిలర్ బండి గోపాల్ యాదవ్, కుమార్ యాదవ్ బహుమతులు అందజేశారు. కోచ్ లక్ష్మణ్ యాదవ్ పర్యవేక్షణలో గొల్లపల్లి మాజీ కౌన్సిలర్ చున్నం అశోక్ చేతుల మీదుగా విజేతలకు పారితోషికాలను పంపిణీ చేశారు. ప్రథమ బహుమతి విజేతకు రూ. 25,000, ద్వితీయ విజేతకు రూ. 20,000, తృతీయ విజేతకు రూ. 15,000 చొప్పున నగదు చెక్కులను అందజేశారు.
ఈ ఛాంపియన్షిప్ విజయవంతం కావడానికి పలువురు ప్రముఖులు, సామాజికవేత్తలు స్పాన్సర్లుగా వ్యవహరించి సహకారం అందించారు. వారిలో గణేష్ గుప్తా, కందకట్ల సిద్దు రెడ్డి, తీగల శివకుమార్ ముదిరాజ్, కోటేష్ గౌడ్, నీరటి రాజు, జెల్లపల్లి నరేందర్, జిట్టే సిద్దులు, బండి శ్రీకాంత్ యాదవ్, నానమోల కుమార్ యాదవ్, నందు, ఇఫ్తికార్ షరీఫ్, జహంగీర్ ఖాన్, లింగం యాదవ్, మహేంద్ర ముదిరాజ్, సత్యనారాయణ గౌడ్, గడ్డం శేఖర్ యాదవ్, తూకాల మురళీకృష్ణ యాదవ్, అశోక్ యాదవ్, అర్జున్ యాదవ్, నాగరాజ్ యాదవ్ తదితరులు ఉన్నారు. రాష్ట్రవ్యాప్తంగా వివిధ జిల్లాల నుంచి తరలివచ్చిన క్రీడాకారులతో ఎస్ఎస్ఆర్ కన్వెన్షన్ సందడిగా మారింది.