పెదబయలు, ఆగస్టు 28: మండలంలోని పలు ప్రభుత్వ పాఠశాలలను జిల్లా విద్యాశాఖ అధికారి (డీఈవో) భానుమూర్తిరాజు శుక్రవారం ఆకస్మికంగా తనిఖీ చేశారు. ఈ సందర్భంగా తొలుత తురకలవలస బాలికల ఆశ్రమ పాఠశాలను సందర్శించిన ఆయన, పదో తరగతి విద్యార్థులతో మమేకమై వివిధ అంశాలపై ప్రశ్నలు అడిగి వారి అభ్యాసన స్థాయిని పరిశీలించారు. ప్రత్యేకించి సోషల్‌ స్టడీస్‌ సబ్జెక్టులో విద్యార్థులకు మ్యాప్‌ పాయింటింగ్‌ను స్వయంగా బోర్డుపై వివరించి బోధించారు. విద్యార్థులు చెప్పిన సమాధానాలపై సంతృప్తి వ్యక్తం చేసిన డీఈవో.. మరింత శ్రద్ధతో చదివి పరీక్షల్లో ఉత్తమ ఫలితాలు సాధించాలని ఆకాంక్షించారు.
అనంతరం పాఠశాల ఉపాధ్యాయులతో ప్రత్యేక సమావేశం నిర్వహించి పలు సూచనలు చేశారు. పదో తరగతి విద్యార్థుల విద్యా ప్రగతిపై ప్రత్యేక దృష్టి సారించాలని, ప్రతి విద్యార్థి పనితీరును ఎప్పటికప్పుడు పరిశీలించాలన్నారు. ముఖ్యంగా చదువులో వెనుకబడిన విద్యార్థులను గుర్తించి వారికి ప్రత్యేక తరఫున బోధన అందించాలని స్పందించారు. రానున్న పదో తరగతి పబ్లిక్ పరీక్షల్లో వంద శాతం ఉత్తీర్ణత సాధించడమే లక్ష్యంగా ఉపాధ్యాయులు సమిష్టిగా కృషి చేయాలని పిలుపునిచ్చారు.
ఆ తర్వాత గంపరాయి మోడల్ ప్రైమరీ పాఠశాలను కూడా ఆయన ఆకస్మికంగా తనిఖీ చేశారు. పాఠశాల నిర్వహణ తీరు, విద్యార్థుల హాజరు శాతంతో పాటు బోధనా విధానాలను క్షుణ్ణంగా పరిశీలించారు. ప్రాథమిక స్థాయి నుంచే విద్యార్థులకు నాణ్యమైన విద్యను అందించడంతో పాటు వారి అభ్యాసన సామర్థ్యాలను పెంపొందించేందుకు ఉపాధ్యాయులు నిరంతరం శ్రమించాలని సూచించారు. ఈ ఆకస్మిక తనిఖీల కార్యక్రమంలో మండల విద్యాధికారులు (ఎంఈవోలు) కృష్ణమూర్తి, పుష్ప జోసెఫ్‌తో పాటు పలువురు ఉపాధ్యాయులు పాల్గొన్నారు.